Aktibismo Noon at Ngayon

Alipato
Alexander Martin Remollino

ANG PANAHON ng Batas Militar ay panahong naglagablab ang mga ningas ng aktibismo. Una'y sa lihim na paraan isinagawa ang pakikitalad, at noong 1975 ay pumutok sa larangang lantad sa pamamagitan ng pag-aaklas ng mga manggagawa sa La Tondeña. Magmula noo'y nagsama ang mga lihim at lantad na pamamaraan ng aktibismo.

Pangunahing naging kaaway noon ng aktibismo ang pasismo ng rehimeng Marcos.

Datapwat di lang ito ang kaaway, pagkat ang pasismo'y hindi sumusulpot nang kung paano na lamang; ito'y laging may ipinagtatanggol na kaayusan. Ang pasismo'y ang pagsakay sa nagbabantang rebolusyon upang linlangin ang masa at pagkatapos ay gamitin ang mga puwersa ng estado upang ito'y pigilin.

Ano ang ipinagtanggol ng pasismo ng rehimeng Marcos?

Bago ipahayag ang Batas Militar, ang lipunang Pilipino'y nakaratay na dahil sa papatinding pangingibabaw ng mga monopolyong Amerikano sa ating ekonomiya, pagsakyod ng ating patakarang panlabas sa dikta ng Estados Unidos, piyudal na pagsasamantala sa sambayanan, at katiwalian sa pamahalaan. Dahil dito'y palaki nang palaki ang bilang ng mga mamamayang nananawagan ng pagbabago sa balangkas ng lipunan.

Bilang katugunan, ipinahayag ni Marcos ang Batas Militar sa likod ng tabing ng isang "rebolusyon mula sa gitna".

Sa halos dalawang dekada ng Batas Militar, nakitang maliwanag na ang rehimen ay hindi isang rebolusyonaryong pamahalaan kundi isang diktadura. Ang mga nilapatan ng puwersa ng estado ay hindi ang kairalan kundi ang mga sumasalungat dito.

Sa harap nito, ang mga ningas nga ng aktibismo'y naging lagablab. Lumawak nang lumawak ang mga puwersa ng pagtutol, hanggang sa isang araw noong 1986, ang buong baya'y nagising na si Marcos at ang kanyang pamilya'y nagsisilikas patungong Hawaii.

Tatlong dekada na mula nang ipahayag ang Batas Militar. Wala na si Marcos. May silbi pa ba ang aktibismo sa ngayon?

Walang alinlangang mayroon pa. Oo nga't napakalaking pinsala ang idinulot ng Batas Militar sa ating bayan. Ngunit ang Batas Militar ay inianak lamang ng pangkasaysayang tendensiya ng mga naghaharing uri na pangalagaan ang mga natatamasa nilang pribilehiyo sa ilalim ng umiiral na kaayusan. Ang kaayusang ipinagsanggalang ng Batas Militar ay narito pa rin, at patuloy na nagbabantang mag-anak ng isa pang Batas Militar dahil sa mga batas ng kasaysayan.

Hanggang sa hindi nalulunasan ang mga sakit ng lipunang Pilipino, mananatili ang pangangailangan sa isang matibay na kilusang aktibista.

For comments and reactions to this article, please visit Tinig.com Forums.